一週股市 — 漸見曙光

大市因日本核危機及利比亞局勢而下挫，但本週在局勢日漸明朗化下已重上23000這個大眾都知的支持位。其實市況並不差，上週的確是撈底的好機會，只可惜資金有限，不能大手掃貨....

講講自己的持股，實質都無咩好講，因為升唔輪到佢升，跌都唔輪到佢跌，好悶啊.....

講重點：
2722下週公佈業績，自己認為會唔錯，希望可藉此突破$2.7黎個阻力位。
2357又係下週公佈業績，之前撈了一手貨，希望能於下週上到$4.5放，其買入動力不錯呢。
2369公佈業績後大跌，都講過，毛純只會不斷下降，使市場對其失望，且看管理層有無新招，同時不必對其前景太擔憂。現價不會再跌得太多，可合理持有。
65這隻衰野剛公佈業績，仲未可以採煤，所以業績倒退。但年報話牌照可於今年上半年拿到，到時可能有個炒下，而且佢又黎5送1啦......不知是福是禍。
833公佈完業績無反應，搞咩鬼，仲唔炒上？貨好乾，同佢鬥磨。

希望下週可以有返D買賣，咁樣牛皮真係好悶。仲有，3月睇業績真係睇到人都暈....下週又有幾份。

業績簡報—中國無線(2369)

中國無線(2369)

業務概述：

集團主要從事移動電話之研發、生產和銷售，主要品牌是「酷派」；及物業投資。

業績：

去年營業額有45億，增加76%；純利有4.8億，增加1倍；每股盈利0.2298，EP即13.5倍；每股派息0.05，增加了0.02，息率為1.6%。

從年報可看到幾點：

第一，雖然營業額增加76%，但毛利未能跟隨。由於集團主攻低檔手機，採取薄利多銷，故定價很低，由上年$1200/部跌到$911/部，毛利率由32.8%降至25.6%。

第二，行政開支因研發及工資而上漲，但仍能繼持在總收入的10%內。

第三，手持6億幾現金，再加上一月抽水又6億幾，共有13億。

第四，4.8億的純利有1.4億來自政府補貼及有9百萬來自炒樓，即手機業務純利有3.3億，佔88%來自3G手機。

個人觀點時間：

第一，市場擔心其毛利率會持續下跌，未能維持高增長，故業績一公佈已下跌。能否提高毛利率會是集團的挑戰，但個人認為不樂觀。因為其主攻低檔市場，無錯銷售量一定多，但此類手機市場競爭大，只會越做越平，很難提升毛利，只能薄利多銷，但市場是會有飽和的一日。

第二，集團大部份收入來自3G手機，其技術支援國內所有電信商，又用Audroid，此會是其手機的優勢，相信未來幾年收入都會不錯。但都係個句，提升毛利是必需的，一係就加強研發埋高檔手機專攻中國市場，一係就開發海外市場。但高檔機未必有Apple、Nokia等品牌優勢；海外市場又非很多國家有發展3G技術。所以唔知管理層有無計呢？

第三，現金流方面則不太穩，流動負債有22億，淨現金則只有6億，要賣埋d貨先夠，不知是否此因素，所以要抽水6億呢？雖不太穩，但短期不會有問題，希望管理層可以善用手頭的13億現金。
第四，技術走勢上，中國無線(2369)股價由高位$5.5下調至$3.21，調整近四成。相信已足夠反映毛利率問題，現價亦接近短期低位，市仍率在市況好時相信還可以提升，有錢可以慢慢吸，博彈返上去。但長遠要睇管理層又何發展其手機業務。

核子危機？

日本地震引發津波，更導致核電廠失靈爆炸，造成核洩漏危機。

其實此恐慌是心理因素大於實際，最起碼這次不會導致切爾諾貝爾核電廠及原子彈爆炸的嚴重問題。而且造成的影響是地區性，局限於日本東北地區，受到輻射的程度亦未必如想像中高。真難想像會有人相信全亞洲都受核雨影響，這種唯恐天下不亂的謠言，有智商的應該很容易看穿吧。在新聞中看見有些闊太話擔心日本鮑魚、元貝遲些供應少，要買定多d。人地日本人擔心緊自身安全同國家的同事，香港人就擔心緊無日貨買！何其悲乎？

股市方面則因這危機而一度暴跌千點，可惜資金不足，不能大手shopping，只是受命蝕數百放了盈大地產(432)，買了少許中國無線(2369)及中航科工(2357)。還未有機會等到432賣樓便要放走它，真可惜，希望有機會補回。2369及2357都是一度能幫手賺錢的愛股，希望今次不要失望。另外，前幾天放左的1808繼續升，真是一刀刀地桶入我的心！

值得一提的是東方電氣(1072)，核危機使其暴跌，市場或許擔心其核電的生意。但我相信這是短暫而且難得的機會。因為國策上中國不會因為核爆而停止建核電廠，而且亦不會受到民間阻止。技術上1072擁有國內市場上最先進的第三代核技術，因核爆而提升核電廠的規格會成為1072的護城河。(題外話：大學時參觀過中國研究中超先進的核四技術，比其他國家的研究快得多，更加有利建核能。)因此，如果有錢，買一注也無妨。

今次更新的歌是東風破，因為今晚的天氣好有這首歌的感覺。

業績簡評：183田生集團

 田生集團(183)

業務概述：公司之主要業務為投資控股。集團主要於香港提供物業經紀服務、進行物業整合、併購與重建計劃及物業買賣業務以及二手電腦買賣業務。年內，集團亦從事物業發展業務。由創業板轉到主板，做收舊樓及搞地產。


業績方面毛利升32%，有1億。但純利最終只有4600萬，比上年少8%，原因是行政開收大增，多成3000萬。資產方面因收多了樓而使價值上升，再加上配股後令現金提升至5億，負債則有2億，即淨現金有3億。無派息。順帶一提，其公司炒股技倆不太好，金融資產公平值係虧損的。


集團現有約260重建項目進行中，係港島區好多地方都見到紅底白字好大塊的橫幅，形象功夫真係做得好差。而且可能請多左人淋紅油，所以開支的確是大左。集團亦計劃自己發展3個物業，都係九龍城，準備強拍。

以下是個人觀點啦：田生從幾方面睇都不是一隻正氣股，小股東要有心理準備，包括自己……。第一，其收樓的手法一向為人所恥，隨便google一下都知。第二，董事會其實係一人公司，大股東只得一個(狙擊手)，再加埋佢另一個朋友，已佔超60%，看不出還有甚麼管治團隊。第三，酬金由去年2512萬激增至8829萬，員工只增加19名，錢去晒邊？心照不宣。第四，資金來源不穩定，搞地產無咩現金流，一係問銀行，一係就問市場，一口氣連繼配股三次，好人有限。第五，年報資料欠詳細，佈喜不佈憂，財務回顧亦只得兩段講晒，CEO同主席都無係年報講話，不見其誠意。

點睇都唔似好人

所以，投機味濃，同胞勿近，我俾佢傷得都幾深，一路係咁陰跌……

業績簡評：1883中信國電

中信國際電訊(1883)前稱中信1616

業務簡介：提供國際話音及可視電話、短信電信樞紐服務、移動電話國際漫遊增值服務和因特網虛擬專用網等數據業務服務，為海外及香港企業提供數據中心服務。類似做長途電話線路，差不多所有進出中國的電話都經其轉駁。

此股並不是自己買的，而且幾年前母親大人買下的，一路未見家鄉，上年幫其溝貨後，現已差不多可以望見家鄉了。個人無意長線持有，只是母命不可違，唯有一直關注一下。

業績方面只是平平，利潤比上年多8%，毛利率只有13%，屬平穩發展。長途業務更有下滑情況，故需要發展其他重點才行，如不是澳門業務入賬，盈利是會倒退。其好處是派息慷慨，利潤有50%用來派息。每年有約3億現金流，減去不足1億負債有2億，遲些再用埋來買中企網，就無晒啦。去年買入澳門電訊20%股份，用5億買入值14億的資產，今年幫其賺8千萬，6年回本。現正進行買入中企網49%，是個好好的注資，使1883成為中信集團旗下電訊業旗艦。

技術走勢方面，去年10月因收購消息而衝上2.8x，高位回落後於2.4x~2.8上落，炒波幅都有賺，而且慢慢形成波幅向上趨勢，於2.5的支持不錯，但2.85的高位則需要時間去破。可以炒位波幅先。

展望方面，1883是穩陣的股票，不受市場注視，現價不太會死人。市場亦主要憧憬其母公司繼續注資，相信下半年如中企網可以入賬則會有不錯收益，長遠應可維持50%利潤派息，而創造的現金流則會不繼交俾母公司黎換資產。所以屬中等、平穩、無驚喜、等派息的公司。

有朋自遠方來

今日約左老占飲野，不過要佢同占嫂咁遠入到黎，真係有點d過唔好意思....唯有下次去返天后請佢食野補數先！~謝謝老占的建議及貼士，我會記住的。仲有，占嫂比我想像中更後生更靚^_^

市況受內銀帶動仍有少許上升，但要小心一些，仍覺得不太踏實。

下午放掉1808，蝕手續費走人，博炒上失敗，留彈藥看時機。

65昨日突然大升20%，看看能否再彈少許作減持......

好股仍好多，只是資金不太多，今日已錯失了293，仍有幾隻值得留意，希望有幾會可以介入！

一週股市 — 波動向上

剛睇完『不能說的秘密』，本週推介就用佢啦~係周杰倫的代表作，佢d戲好少有咁好架啦~

回歸正題：本週的股市仍很波動，一日上升幾百，第日又可以跌返幾百，做期指的朋友仔真係被左一巴又一巴了.....雖然波動，但個人持股收益卻整體比上週有所提升，某程度反映市況不太差。加上中國召開兩會，市場或會又開始炒政策受惠股。故本週的水泥股已率先反彈，舊愛2233更重上到近$3，雖然錯失，但對其高負債及主席押股俾個仔做生意感到憂慮，還是算吧。

本週亦有作了少許交易，包括沽出2357。其突破$4後一直走勢良好，經過數月於$3.7~$3.8收集，配合炒注資的概念，使其十分強勢。但因市況波動，減低高市盈股票的持有比例會較保險，所以於$4及$4.36沽清走人。其實最好沽出時機是前幾個月，很可惜沒有行動，導致失去不少機會。如其跌近$4會考慮小注買入，不知有無機會。

賣出2357後買入432盈大10,000股@$1.57。因為小小超與伊沙貝拉分手，相信要付出高昂代價，故期望他會盡快賣出北京層樓套現，以補償損失。如果真的賣得成，特別股息會有不錯的回報，現價下跌容間有限，等消息。

另亦買入1808一台70000股@$0.395，因為偉哥的介紹：大股東收購，有安全網，博於3月10日前有炒作，否則蝕手續費走人。

之前亦在567大跌時於$0.49買入博反彈，至本週已有少許成果，留意能否破$0.6。

愛股2722終於有少許起色，超賣後突破下降軌升穿$2.6，暫時可鬆一口氣。業績期及二會效果期望有助它一路向北。

833曾有幾分鐘異動，現在又回到基本軌道上，繼續培養耐心。

資金有限，很好股通街有，真令人心痕.....