今日股評 19/05/2011

今日想講講幾隻股票的異動。

2369中國無線，今日發個盈警，之後應聲大插近30%，走趨圖上靚過郭晶晶跳水，一點水花都無彈上！大成交下大插到咁真係較少見，因為話晒都係大眾與金手指愛股，唔知金手指有無份沽貨呢？媽媽之前仲有$3.3的貨，今輪真係有排等。之前都分析過，業績報告都話毛利率有壓力，已有心理準備，只是無預過會一日跌到咁。自己亦都於$2.1撈左一手，見都企得穩以為可以反彈，點知尾市仲跌穿$2，好彩買得少，黎兩日唔反彈即走，目標係$2.5裂口位。post之前，仲未上返$2...

3800保利協鑫，此股之前有留意，但無買。網上好多人都有跟買，又話前景很好，但點知連跌六、七日，今日始有反彈。太陽能自己唔識，基本面上是有國策支持而且此股屬國企，又是上游業務，應不會差得邊。但技術上話俾我知，佢雙頂兼裂口穿50天線，唔死一身散，短期都好難有運行。或者市場是流行沽中投股，又或有隱藏因素我唔知，不過咁瀉法都係小心為上。此股亦再次引證，當市場一面倒睇好之時，人聲頂沸的個股已接近轉勢之時。

執筆之時189東岳、2128聯塑、868信義玻璃都出現大瀉，這幾隻股之前都是市場的領先股，而家出現咁的情況，會是跌市尾聲的先兆，還是市場轉換主題的時機呢？下個星期相信自有分曉。